ตโย อกุสลเหตู สวิตกฺกสวิจาราฯ ฉ เหตู สิยา สวิตกฺกสวิจารา, สิยา อวิตกฺกวิจารมตฺตา, สิยา อวิตกฺกอวิจาราฯ กพฬีกาโร อาหาโร อวิตกฺกอวิจาโรฯ ตโย อาหารา สิยา สวิตกฺกสวิจารา, สิยา อวิตกฺกวิจารมตฺตา, สิยา อวิตกฺกอวิจาราฯ ปญฺจ ผสฺสา อวิตกฺกอวิจาราฯ มโนธาตุสมฺผสฺโส สวิตกฺกสวิจาโรฯ มโนวิญฺญาณธาตุสมฺผสฺโส สิยา สวิตกฺกสวิจาโร, สิยา อวิตกฺกวิจารมตฺโต, สิยา อวิตกฺกอวิจาโรฯ ปญฺจ เวทนา… ปญฺจ สญฺญา… ปญฺจ เจตนา… ปญฺจ จิตฺตา อวิตกฺกอวิจารา มโนธาตุ สวิตกฺกสวิจารา , มโนวิญฺญาณธาตุ สิยา สวิตกฺกสวิจารา, สิยา อวิตกฺกวิจารมตฺตา, สิยา อวิตกฺกอวิจาราฯ

(1) รูปทุกํ

[1043] ปญฺจนฺนํ ขนฺธานํ กติ รูปา, กติ อรูปา…เป.… สตฺตนฺนํ จิตฺตานํ กติ รูปา, กติ อรูปา?

รูปกฺขนฺโธ รูปํฯ จตฺตาโร ขนฺธา อรูปาฯ ทสายตนา รูปาฯ มนายตนํ อรูปํฯ ธมฺมายตนํ สิยา รูปํ, สิยา อรูปํฯ ทส ธาตุโย รูปาฯ สตฺต ธาตุโย อรูปาฯ ธมฺมธาตุ สิยา รูปา, สิยา อรูปาฯ ตีณิ สจฺจานิ อรูปาฯ ทุกฺขสจฺจํ สิยา รูปํ, สิยา อรูปํฯ สตฺตินฺทฺริยา รูปาฯ จุทฺทสินฺทฺริยา อรูปาฯ ชีวิตินฺทฺริยํ สิยา รูปํ, สิยา อรูปํฯ นว เหตู อรูปาฯ กพฬีกาโร อาหาโร รูปํฯ ตโย อาหารา อรูปาฯ สตฺต ผสฺสา อรูปาฯ สตฺต เวทนา… สตฺต สญฺญา… สตฺต เจตนา สตฺต จิตฺตา อรูปาฯ

(2) โลกิยทุกํ

[1044] ปญฺจนฺนํ ขนฺธานํ กติ โลกิยา, กติ โลกุตฺตรา? ทฺวาทสนฺนํ อายตนานํ กติ โลกิยา, กติ โลกุตฺตรา? อฏฺฐารสนฺนํ ธาตูนํ กติ โลกิยา, กติ โลกุตฺตรา? จตุนฺนํ สจฺจานํ กติ โลกิยา, กติ โลกุตฺตรา…เป.… สตฺตนฺนํ จิตฺตานํ กติ โลกิยา, กติ โลกุตฺตรา?

รูปกฺขนฺโธ โลกิโยฯ จตฺตาโร ขนฺธา สิยา โลกิยา, สิยา โลกุตฺตราฯ ทสายตนา โลกิยา ฯ

ทฺเว อายตนา สิยา โลกิยา , สิยา โลกุตฺตราฯ โสฬส ธาตุโย โลกิยาฯ ทฺเว ธาตุโย สิยา โลกิยา, สิยา โลกุตฺตราฯ ทฺเว สจฺจา โลกิยาฯ ทฺเว สจฺจา โลกุตฺตราฯ

ทสินฺทฺริยา โลกิยาฯ ตีณินฺทฺริยา โลกุตฺตราฯ นวินฺทฺริยา สิยา โลกิยา, สิยา โลกุตฺตราฯ ตโย อกุสลเหตู โลกิยาฯ ฉ เหตู สิยา โลกิยา, สิยา โลกุตฺตราฯ กพฬีกาโร อาหาโร โลกิโยฯ ตโย อาหารา สิยา โลกิยา, สิยา โลกุตฺตรา ฯ ฉ ผสฺสา โลกิยาฯ มโนวิญฺญาณธาตุสมฺผสฺโส สิยา โลกิโย, สิยา โลกุตฺตโรฯ ฉ เวทนา โลกิยาฯ มโนวิญฺญาณธาตุสมฺผสฺสชา เวทนา สิยา โลกิยา, สิยา โลกุตฺตราฯ ฉ สญฺญา โลกิยาฯ มโนวิญฺญาณธาตุสมฺผสฺสชา สญฺญา สิยา โลกิยา, สิยา โลกุตฺตราฯ ฉ เจตนา โลกิยาฯ มโนวิญฺญาณธาตุสมฺผสฺสชา เจตนา สิยา โลกิยา, สิยา โลกุตฺตราฯ ฉ จิตฺตา โลกิยาฯ มโนวิญฺญาณธาตุ สิยา โลกิยา, สิยา โลกุตฺตราติฯ

อภิญฺญา ทฺเว สารมฺมณา, ทิฏฺฐา กุสลเวทนา;

วิปากา จ อุปาทินฺนา, วิตกฺกํ รูปโลกิยาติฯ

ธมฺมหทยวิภงฺโค นิฏฺฐิโตฯ

วิภงฺคปกรณํ นิฏฺฐิตํฯ